Beeldbank

Menu: Beeldbank

Aantal gevonden foto's : 2   (van: 9460)

http://www.wannevleegers.nl/

Lopen vanaf 2017 niet meer mee in de Venloose optocht.

Ut begin van vrindeclub de Wannevleegers

"De Wannevleegers" als vrindeclub is in 1961 opgerich in kefee "Stakenborg" de Staak aan de Kaldenkerkerwaeg in Venlo. De naam woord bedach door Willem Stakenborg de vader van Jeu de Staak. De ierste activiteit waas voetballe in de kefe voetbalcompetitie. Dit deeje weej tot 1971

Daornao ginge we vaerder als vrindeclub. Net zoëas de man -dae de minse veur de gek heeld met det vleege euver de Maas- zit der auk vuuël ondeug onder de leeje. De humor zit in de meijste aktiviteite. Maondeliks hebbe we un vergadering met un echte agenda. De agendapunte zien groeëtendeils verzónne en zörge veur vuuël gestraevel. Un belangriek onderwerp van dees vergaderingen is natuurlik den optoch. Ut is neet niks um mier dan 50 jaor iets te bedinke veur den optoch det, volgens good Wannevleegers gebroeëk, niks met ut motto van de Jocus haet te maake. We staon er um bekind meijstal veur un verrassing te zörge. In 1972 kreege we de ierste pries (unne staaf). Daornao kwaame der nog mier prieze. In ut euverzicht kind ge zeen wat weej de letste jaore in den optoch hebbe gedaon

En dan hebbe weej auk nog culturele actviteite. De jaorlikse fietstoch haet un mótto en is meijstal verkleid. Beej ózze presentatie beej ut vereinigingsscheete van ut Ackermansgilde waas de groep verkleid als schutterie met unne keuning en keuningin. Op de jaorlikse toepaovend is ut de kunst um veur ein paar euro te zörge dat der groeëte en verrassende prieze op de taofel kómme te ligge. Ut jaorlikse reisje naor binnen- en bóeteland is veurnamelik cultureel en um met de bewoeëners van det land of die streek te praote euver ut laeve.

En neet te vergaete wuurt der in de jaorvergadering "de Wannevleeger van ut jaor" gekaoze. Det is dan un lid met bizondere verdeenste of gewoeën eine zónder. 

De naam "Wannevleeger" kwaam waarschienlik van ut verheulke dat der óeit in 1651 unne vreemdeling in Venlo waas gewaes dae beweerde dat hae taege betaling, met twieë wanne de Maas kós euvervleege. Natuurlik kós hae de rivier neet euvervlaege, maar ontsnapte wal met ut geld. Door deze oplichting kreege de Venlonaere de spotnaam Wannevleegers tóebedeild.

"De Wannevleegers" is unne naam wao un groeëte historie achter schuúl geit. Ut Is ziér waarschienlik de iërste vastelaovesvereiniging van de stad Venlo. Al in 1754 zien d'r namelik vermeldinge van de Venlose "Academiae des Wannes". Zekerheid euver de ontstaondatum is der neet. Maar zeker is wal dat die op 23 februari 1784 al bestónd. Op dae datum meld nl. unne Duitse krant dat un afvaardiging van de Venlose "Wannevleegers" beej ut 100-jarig bestaon van de Narrenacademie in Dülken, op ± 20 km van Venlo in Duitsland, als gast aanwezig waas. De vereiniging organiseerde in idder geval al optochte in de jaore viertig van de negentiende ieuw. Deze woorte naeve die van de Jocus gehalde. In 1842 krieg Jocus unne breef van Vors Wannerius XI mit ut verzeuk um same te werke. Jocus is de vereiniging veur de riéke stand en de Wannevleegers is veur ‘t gewoeëne volk. Vaerder is nog bekind det beide vereiniginge in ut jaor 1887 unne optoch hebbe gepland in Venlo. Mier duudelikheid is der euver de opheffing, die mót rond 1888 hebben plaatsgevonde.
1

1.
Database nr.: 00002107
V.C. De Wannevleegers 1973 (1)

  

2.
Database nr.: 00002108
V.C. De Wannevleegers 1973 (2)

  

1