Beeldbank

Menu: Beeldbank

Aantal gevonden foto's : 2 (van: 9474) Sorteer op:

VV de Sjoutvotte is de vastelaovesvereiniging van de Gelaense wieke De Kloes en Gelaen-Zuid.

Oprichting

De Vereiniging is opgerich op 16 jannewarie 1960 in 't veurmalige café ’t Kluisje. Ein aantal luuj van de vootbalvereiniging De Wertha Boys ware van meining dat d'r in de woonwiek de Kloes get meë aan georganiseerd karnaval gedaon moosj waere. Me vormde eine Raod van Èllef en reep 'ne Prins oet. Eine naam veur de vereiniging waas al sjnèl gevónje; De Sjoutvotte. Dit waas de sjtart gewaes van ein vereiniging die ummer in bewaeging is gebleve.
Eësjte prins is Lambert I (Derrez) in 1960 en eësjte president is Piet Giesberts in 1961. De tempel van de Sjoutvotte woort de Heremiet gelaege aan de Kloes.

De naam Sjoutvotte

Achter de naam Sjoutvotte zit natuurlik ein verhaol. Lètterlik vertaald in 't Nederlands is 't Schuld-konten. De Gelaense woonwiek en parochie de Kloes breide in de vieftiger jaore heël sjnel oet, väöl inwoners ware doe wirkzaam op de Sjtaatsmien Maurits in Gelaen. In die jaore begoosj 't eige-hoes bezit op gèng te kómme en d'r wore dan ouch väöl weuninge, al dan neet in eige beheër, geboewd. Óm dae boew te kènne bekostige moosj me uteraard geldj leëne, sjöld make dus. Ein Limburgse oetdrökking veur emes dae sjölde haet is; Dae haet de vot vol sjout!. De naam Sjoutvotte waas doe daomit gebaore.

Activiteite

In 't beginjaor heel de vereiniging zich vriejwaal allein bezig in de woonkern zelf, d'r woort 'ne Prins oetgerope, me heel balaovende, d'r woorte kaartaovende georganiseerd óm de kas te sjpekke en d'r woort ein receptie gehawwe. ’t Dao-op volgende jaor woort deilgenómme aan de karnavalsoptoch in Gelaen en góng me op bezeuk biej de collega-vereiniginge in o.a. Sjpawbaek en Awt-Gelaen. In 1964 trooj ein tweëtal dames toe tot de vereiniging es tanzmerieke, vanaaf doe höbbe de tanzmeriekes ummer deil oetgemaak van de vereiniging.

De activiteite van de vereiniging breijde zich wiejer oet, direk nao de äöpening van 't Gelaense ziekehoes in 1965 brach de vereiniging ein bezeuk aan dit ziekehoes en euverhanjigde aan alle patiënte ein fruitmendje. Alle jaore daonao, pès aan 1998 toe, is dees traditie gehandjhaaf gebleve op de zóndig veur karnaval. In 1998 is 't Gelaense ziekehoes aafgebraoke en gedeiltelik opgenómme in 't ziekehoes van Zitterd. Oos vereiniging haet dit veurval zeen aankómme en is in 1994 naeve de ummer minder waerende patiënte in 't ziekehoes ouch de luuj in de St. Odiliakleniek gaon bezeuke mèt ein fruitmendje. In dees kleniek wone tiedelik zoa ’n 225 persone.

In 't cultureel gebeure van karnaval haet ós vereiniging ummer väöl plaatsj ingeruumd veur de sociale kantj. Wiej de bezeuke aan 't ziekehoes good ginge drèjje zint de activiteite oetgebreid mèt ónger angere karnavalsaovende veur awwerevereiniginge, karnavalsmiddigge veur de jeug, eine karnavalsaovend in 't bejaordecentrum De Bunderhof, bezeuke aan de Sint Janskliniek, bezeuke aan aovende van anger vereiniginge in de parochies. Nog ummer sjtaon de hiej geneumde activiteite op 't jaorlikse program van de vereiniging. Op dit program prieke ouch de algemein activiteite zoa-es de äöpening van 't sezoen, de Prinsoetroping, de receptie voor de Prins, 't Prinsebal, de deilname en de optoch, enz. Allemaol activiteite die 't bezeuke de meujte waerd zint.

Nuuj wiek

Naeve de wiek de Kloes woort vanaaf de jaore 1950-1960 ein gans nuuj woonwiek geboewd, gedeiltelijk besjtaonde oet hoagboewflats, mèr ouch väöl eingezinsweuninge. De nuuj wiek kroog de naam Gelaen-Zuid en de Sjoutvotte nómme de wiek op in hun wirkgebeed. De bevolking van de Kloes en Gelaen-Zuid sjteit heëlemaol achter hun karnavalsvereiniging en sjteune de activiteite jeder jaor gaer mèt ein financiële biejdrage.

Samewirkende vereiniginge

Óngertösje haet de vereiniging, v'r sjrieve dan 1971, zien vleugele breijer oetgesjlage. In Gelaen zint vief groatere karnavalsvereiniginge die jeder apaart in ein deil van de sjtad wirkzaam zint. Ze höbbe alle vief ein samewirkingsverbóndj aangegaon, d'r waere gezamelik activiteite gehawwe, óngerling waere programma’s opein aafgesjtömp en me bezeuk mekaars aevenemènte. 't Verbónj, genaamp SGVV, wat sjteit veur Samewirkende Gelaense Vastelaoves Vereiniginge, organizeerde in de loup van de jaore meërdere activiteite, o.a. besjteit d'r saer 21 jaor ein Leedjeskonkoer.

Dansactiviteite, tanzmeriekes

De Sjoutvotte gaon naeve 't samewirke in Gelaen ouch hunne eige waeg. Tanzmeriekes zint in al die jaore biej de vereiniging aanwezig gewaes, ummer ónger de hoede van de vereiniging zelf en neet es zelfsjtendige dansvereiniging. Door de tanzmeriekes haet me dan ouch ein groatere bekèndheid in Limburg gekrege, väöl oetneuëdiginge waere óntvange óm hiej en dao op bezeuk te gaon en dat wirt dan gaer gedaon same mèt de dansende groepe maedjes d'r biej. Op ein gegaeve mement wille dee maedjes zich waal èns 'maete' mèt anger tanzmeriekes en de vereiniging wirt daoróm lid van de dansbóndj NBCD. D'r waere jeder jaor versjillende danssjporttoernooje bezoch, de optraejes biej anger vereiniginge volgde mekaar op en de vereiniging raakde ummer bekènder op 't gebeed van 't danse. Biej gelaegeheid van 't 3 maol 11 jaorig jubeileum van de vereiniging, gevierd in november van 't karnavalssezoen 1992-1993, zint de Sjoutvotte gesjtart mèt 't organizere van ein eige danssjporttoernooj. Ouch in de jaore daonao kaome de deilnummesj heël gaer nao de Gelaense Hanenhof óm hun eige kunne te maoge toane. In 1998 haet de vereiniging aansjloeting gezoch biej eine angere dansbóndj, de NDO.

Jeugraod, Jeugprins

Neet allein de vrouwelike jeug kump biej De Sjoutvotte aan bod, vanaaf 1971 besjik de vereiniging ouch euver ein Jeugraod van Èllef. Eësjte Jeugprins is Bernie I (Engelen). De raod is samegesjtèld oet leërlinge van de basissjoale in allebei de wieke, reup jeder jaor 'ne Jeugprins oet, bezeuk o.a. de receptie van de Sjoutvotteprins en Jeugprins, organizeert karnavalsactiviteite op de sjoale en nump deil aan de Gelaense kènjeroptoch.

1

1.
Database nr.: 00006204
V.V. de Sjoutvotte (01)

DE SJOUTVOTTE - GELAEN-ZUID

2.
Database nr.: 00006205
V.V. de Sjoutvotte 1970

SJOUT VOTTE - 11 Prins: Piet II