Beeldbank

Menu: Beeldbank

Aantal gevonden foto's : 6   (van: 9467)

Neet Um Aan Te Huùre (NUATH) is 'n joekskapel oét Venlo.

NUATH is opgerich op 1 april 1976 beej handbalvereiniging Loreal. NUATH besteit oét 20 muzikante, met ein traditionele bezetting van slaagwerk, träöte, schuùve, tuba's, baritons, alt-sax en sousafoon. NUATH ónderscheid zich t.o.v. minnig andere kapel door beej de optraejes ouk te zinge.

Verklaoring Logo: 't NUATH logo is óntworpe en geteikend door Piet Camps. 2 Muzikante, eine trompettis en eine trommelaer, umsloéte de dieke trom. De schoon van de muzikante vorme 't Venlose stadhoés. NUATH druuëg ein tenue bestaonde oét ein "Vleegeneerspak met lere vleegersmuts" alles in de kleure Roeëd en Blauw, de stadskleure van Venlo. Op de dieke trom staon naam en "woeënplaats" vermeld. Op de schoonzaole steit 't jaortal van oprichting vermeld.

Optraejes

NUATH traejt met name op tiejes de vastelaovend in Noord-Limburg in 't algemein en in Venlo en umgaeving in 't biezónder. Aanspraekende Vastelaoves-optraejes haet NUATH jäörliks beej o.a. Jocus, de Boerebroelof,de Boetegewoeëne Boetezitting. Veur de aafwisseling wuuërt d'r aevel ouk in de ganse provincie Limburg opgetraoje. Veurbeelde heejvan zien o.a. D'n Uul in Remund, de Beerpiep in Tegele of de Boerebroelof is Kessel. Aangezeen NUATH ouk ein stevig Kölsch rippertwaar haet wuuërt de kapel ouk regelmaotig in Pruusses gevraog veur optraejes. 't Repertoire besteit veurnamelik oét Venlose vastelaovesleedjes, aangevöld met nummers van o.a. Die Bläck Fööss en Beppie Kraft, de Schintaler e.d. Anders dan beej de meiste andere Joekskapelle waere de optraejes met zang versterk.

Discografie

 
CD-hoes Derds, geteikend door Piet Camps. Op de hoes zien te herkinne (vlnr) De stichter van Venlo Flujas, D'n Pallesaot, Die Dieke met die Flaai en Baer de Woers.

NUATH haet wiés noow ein veertal cd's oétgegaeve.

  • 1995 Nappes op de Vim
  • 2000 Oétverkoch
  • 2005 Derds
  • 2008 Projec Zurtitrie - Zoèpkoel truuk

D'n óndertitel van de derde CD is "Nuath en vrinde". Dees vrinde hebbe idder op eur typerende wiès eur beejdrage aan ein of miër nummers van dees CD geleverd. Sjraar Peetjens zingk Twieë einzame en wuuërd daobeej begeleid door Roy Grutters op d'n trekbuul. Bart Houtermans haet 't euver Die dieke met die Flaai, René Scheffer zingk eine Braziliaanse medley, óndersteund door de Ruiverse Samba Bend "Banda Topa Tinga". Op 't nummer Baer de Woers liet percussionis Teddy Lekatompessy Afrikaanse invlode huere en Tom Bartels begeleid 't e.e.a. op ziene bas. Vaerder staon op dees cd ouk 't nummer Viva Venlona. Dit letste nummer haet 6 waeke nummer 1 gestaon in de Venlose 15.

Met de opbringste van dees cd's is Nappes op de Proms georganiseerd.

Nappes op de Proms

 
Logo van Nappes op de Proms

In 1996 haet NUATH 't muziek-aevenement "Nappes op de Proms" veur 't iërs georganiseerd. Nappes op de Proms haet tot doel um zoevuuël wie meugelik "origineel" oetveurende artieste weer op de bühne te kriege. Dit resulteerde in de "revival" van o.a. Sjraar Peetjens en Funs van Grinsven. Nappes op de Proms wuuërt ens in de 2 á 3 jaor georganiseerd (1996, 1998, 2000, 2004, 2007, 2009). De 7e en taeves letste editie haet plaatsgevónde in jannewari 2011. Naeve iërder geneumde corifeje hebbe artieste wie Huub Stapel en Glenn Corneille ouk eur beejdrage geleverd aan ein of miërdere oétveuringe van Nappes op de Proms.

't Nappes op de Proms logo is ein samestel van 't NUATH Logo met ein foto van Funs van Grinsven. Dees foto is genaome tiejes de 1e Nappes op de Proms in 1996. Funs van Grinsven (op de rök gezeen) neemp 't applaus in óntvangs van de ruùm 1100 óntroerde luusteraers.

Thoèshónk

Nao jaorelangk De Venlonazaal as thoèshónk te hebbe gehad is NUATH sins 2006 vaste "bewoeëner" van Grand Kefee Baer de Woers van Fred Honig in hertje Venlo. As d'r oètgeweke mót waere wuuërt 't Tref as oétvalsbasis bezóch.

Projecte

Projec Zurtitrie is ein niej, al opgestart projec van NUATH. 't Straeve um jeugdige muzikale talente ein podium te gaeve binne de Limburgse meziékwaereld leet ten gróndslaag aan dit nieje NUATH projec. Vanaaf 8 fibberwari 2008 zuut de nieje bend "Zurtitrie", ein samestel van NUATH muzikante en jónk (pop) talent oét Venlo en umgaeving 't laevesleech. Electrisch versterkde gitare, ein éch Hammondorgel,'nne trekbuul, drums en percussie, basgitaar en zang waere gekoppeld aan JK NUATH um oétintellik ein nieje bend te vorme. Meziékstiele wie "Jaore '70 disco", "Jazz", "Rock", "BreakBeat" en onvervalsde "Blues" waere in ein modern "blaosJeske" gestaoke. Opnames veur CD & Video hebbe op 28 en 29 juni 2008 plaats gevónde. Via deze link Projec Zurtitrie trailer kint geej alvés ein stökske beluùstere. De prissentatie van de CD "Zoèpkoel truuk!" haet plaats op 21 september 2008 beej Baer de Woers in Venlo.
1

1.
Database nr.: 00005968
Joekskapel Neet Um Aan Te Huùre (01)

NEET UM AAN TE HUÜRE

2.
Database nr.: 00008084
Joekskapel Neet Um Aan Te Huùre 1995

Neet um aan te Huùre Nappes op de Vim

3.
Database nr.: 00008083
Joekskapel Neet Um Aan Te Huùre 1996

Nappes op de proms

4.
Database nr.: 00006173
Joekskapel Neet Um Aan Te Huùre 1996

Nappes op de Proms NUATH 1976

5.
Database nr.: 00008085
Joekskapel Neet Um Aan Te Huùre 2005

DERDS Nuath en vrinde

6.
Database nr.: 00009451
Joekskapel Neet Um Aan Te Huùre 2008

3x11 JAOR NEET UM AAN TE HUUR - VENLO 1976

1