Vriendengroep sinds 1978.
Heraldiek Kammezäölkes
De gebeurtenis die heej ônder beschreve wuèrt is ein verklaoring die geliërde hebbe kinne opmake oët de ônlangs truuk gevônde aanteikeninge van de geschiedschriëver d'n hiër H.H.H. Uyttenbroeck.
De raeje waorum Henry H.H. Uyttenbroeck deze veur Venlo toch waal historische daag neet vermeld haet in ziën daagbook is umdet hae toen nog neet kôs schriëve.
Henry H.H. Uyttenbroeck haet in zien inventiviteit, (zoë is nôw gebleke oët zien kleuter-aanteikeninge), dit historische feit opge-teikend in ein van zien iërste kleurbukskes, (die hae had gekrege als snoepje van de waek beej de kruidenier op d'n hook).
Dit alles allein efkes ter kinnis gaeving.
D'r waas ens eine kiër einen daag dae veel, op einen daag zowië de daag van vandaag d'r neet miër zien. Ech zônne daag die d'r allein maar ware in d'n tiëd van veur det ut veurgister vandaag waas. 12 september 1804 dus.
De zôn stônd hoëg aan d'n hemel ut raegende bakstein en de duvelkes hadde kermis.
De Venlose bevolking waas un bietje oët eure doon umdet Napoleon Bonaparte vônd det idderein zich eine eige naam meus aanmaete. Waat dao oët is gekômme, heej ein paar veurbeelde: Naaktgeboren, Billekens en Bouten.
Alles zoog d'r nao oët det dit eine gewoëne daag zoel waere persies as alle andere gewoëne daag, maar ut woort anders.
Napoleon waas ut binne zitte zat. Hae zat ziene steek op en stook zien hand tösse de riej knuip en ging ein blökske um. Waat wilt nôw ut toeval, persies op ut moment det Napoleon ein blökske um geit is Guntruud (vrouw van Flujas) de was aan ut ophange. Dit is vaerder neet zoë biezônder ware ut neet det ut auk net behuèrlik begôs te weije en waal met vlaage van minstes windkrach 6.
Ônderwiel is Napoleon beej de achterum van Guntruud en Flujas gekômme.
Op ens, ônverwach, zônder det auk maar emus d'r erg in had, unne windvlaag van minstes windkrach 8. De moëiste borsrok van Guntruud vluèg van de waslien aaf euver de moor (die stônd as aafscheiding tösse haof en gats) zoë in Napoleon zien snoët. Dae kiek en zaet: "magnifiek un cammizool det is waat veur mien Josefien veur as ik dalik euver veer jaor waer thoës kom". Napoleon waas net begôs um dae borsrok op te rape of dao kump Flujas aan gespaaijd. Hae had Guntruud huère roope: "Flujas, leeven hemel, miene borsrok vluèg d'r tösse-oët". Hae haet zich dus opgepak um dae borsrok weer efkes truuk te hange op de waslien. Hae waas aan ut luime, dus vuèl zin had hae d'r neet in, maar ja, waat duis-te as de borsrok van dien vrouw van de waslien aafvluèg. Enfin, hae zuut Napoleon dus met dae borsrok kloët-vinke en zaet "heej kammeraod meug ik det dingk truuk?" Napoleon verstelt um neet good en zaet: "det is genne kammeraod, maar unne cammizool!".
Flujas dae al kraegelig waas vroog nog ens ut zellefde: "heej kammeraod, meug ik det dingk truuk?".
Weer versteit Napoleon um neet good en zaet: "dit is unne cammizool en genne kammeraod".
Det waas ut begin van ein straevelpartie die neet te beschriëve waas. Op zien Venloos en Frans woort d'r gevlook, dao vroote de hund gen broëd van. Nao genôg touwtrekkerie is ut Flujas oëtintelik gelök um de borsrok alik oët de hand van Napoleon te kriëge. Napoleon kôs dit neet veele en woel dae borsrok weer truuk en hae dach aan ein bekind spraekwoord waat zaet "wae neet sterk is môt slum zien". Dus Napoleon ziën truukedoës ging aop, maar in de Maas struimde neet vuèl water en de hofleverancier had nog neet in Venlo aangelag um de niëje gevölde truukedoës, dae Napoleon per telefax besteld had, oët te levere.
De truukedoës waas dus aop en ging rap waer toe. Dao stond Napoleon met laege hand, hae keek omhoëg nao Flujas en zaet: "Halt diene cammizool maar, Kammezäöl!!".
Flujas dae neet wis waat hae hoort kôs heej hertelik um lache en zei taege idderein dae ut maar woel huère det hae Kammezäöl geneump waas.
Sportief wie Flujas waas zaet hae taege Napoleon: "Pak vas dae Kammezäöl, dan laote weej de Venlonaere zeen wao ut allemaol mei begôs is!
Ônbewus haet Napoleon ôs Venloos dialek ein niej woort gegaeve.
Kammezäöl beteikent borsrok maar taeves iets groëts, flink oët de kluute gewasse. Ut vind ziene oorsprong in de Franse taal.
Wie in ut begin al gezag de geschiedschriëver Henry H.H. Uyttenbroeck kôs toen nog neet schriëve en haet ut toen met dees teikening waergegaeve.
|
facebook